Поетот Борче Панов, кој живее и создава во Радовиш, пред љубителите на литературата во Скопје ќе се претстави на 5 октомври (среда) во 12 часот со своето најново дело, стихозбирката „Човечки тишини“...
На промоцијата во Друштвото на писателите на Македонија за „Човечки тишини“, објавена во издание на „Силсонс“ од Скопје, ќе зборува поетот и литературен критичар Бранко Цветкоски, а стиховите ќе ги кажува Александра Велинова. Со книжвниот настан во ДПМ Борче Панов одбележува и 25 години од својата дебитантска нига „Што виде Чарли од наопаку".
Во изминатите две и пол децении Панов ги објави и стихозбирките: „Циклонско око", „Стоп Чарли", „Такт“, „Гатанка од стакло“, „Базилика на ракописот“, „Заумна вечер“, „Вдах“ и „Човечки тишини“.
Избрани песни од Борче Панов се застапени во неколку анталогии и панорами на современата македонска поезија. Дел од неговата поезија е преведуван на англиски, германски, украински, бугарски, каталонски, словенечки, српски, француски, шпански, дански, шведски, албански и монголски јазик. Добитник е на повеќе книжевни признанија.
Борче Панов член е на Друштвото на писателите на Македонија од 1998 година. Сега е член на Претседателството и на Собранискиот одбор на ДПМ, како и претседател на Меѓународната книжевна манифестација „Караманови средби“.
