По повод 70-годишнината од постоењето на Институтот за класични студии, на Филозофскиот факултет-Скопје денеска, 22 и утре, 23 ноември ќе се одржува меѓународен научен собир...
На меѓународната научна конференција „STUDIA CLASSICA ANNIVERSARIA ‒ 70 години од Институтот за класични студии“ ќе учествуваат повеќе од 40 гости од Македонија, Бугарија, Србија, Хрватска, Швајцарија, Холандија, Словачка, Полска. Учесниците ќе презентираат различни теми од сите области на класичната филологија (книжевност, лингвистика, философија, историја, епиграфика, археологија).
Конференцијата ќе биде придружена со изложба на книги, поставена во аулата на Филозофскиот факултет. Институтот за класични студии е една од првите наставно-научни единици на факултетот, кој почнал својата дејност во 1946 година како Семинар за класична филологија.
Основач на Семинарот, а воедно и прв декан на Филозофскиот факултет во периодот 1946-49 година е професорот Михаил Д. Петрушевски. Во 1956 година Семинарот прераснал во Катедра за класична филологија, од 1977 година со новиот Закон за високо образование, Катедрата за класична филологија е преименувана во Наставно-научна група за класични студии, а од 1988 година во Институт за класични студии, назив што го носи и денес.
