Друштвото за издавачка дејност Македоника литера од Скопје деновиве го објави најновиот број на списанието „Македоника“...
Во бројот 17 се публикувани повеќе текстови тематски поврзани со Македонија. Во новиот број, меѓу другото, се објавени два мемоарски текста – едниот е извадок од спомените на Георги Баждаров (досега необјавени во Македонија), а другиот е текстот на Германецот Ханс Ерке „Македонија во доживувањата на германскиот војник“, кој всушност е негово сеќавање за Македонија во која престојувал како војник во текот на Првата светска војна.
Невен Радически пишува за странската пропаганда во Македонија во педесеттите години на минатиот век, а Драган Зајковски за карактеристиките на византиското религиско мисионерство во периодот од 9 до 11 век.
Димитар Љоровски Вамваковски пишува за андартското движење во југозападна Македонија во 1906 година, а се публикувани и документи за масакрите на грчките андартски чети во Македонија во тој период. Александар Трајановски пишува за Иван Наумов – Алабакот, ослободителот на Крушево за време на Илинденското образование, Владимир Јанев за занаетчиската дејност ан Евреите во Македонија во 18 и 19 век, а од Александар Симоновски е објавена статија за апсењето на Миливоје Трбиќ во 1947 година.
И во овој број е објавен литературен прилог од странски автор тематски посветен на Македонија – песна од Рафал Алберти.
На крајот се објавен и осврти на Александар Трајановски и Васил Дрвошанов за македонистички трудови, како и информации за новообјавени трудови поврзани со македонската култура и историја.
