„Фауст“ е последна претстава во театарскиот опус на познатиот словенечки и меѓународно признат режисер Томаж Пандур кој во април годинава ненадејно почина на проба во МНТ каде го подготвуваше „Кралот Лир“...
На „МНТ Фест“ во Македонскиот народен театар на 24 јуни ќе гостува „Фауст“ – копродукција на Словенско народно гледалишче и 63-от Фестивал Љубљана.
Тоа е последна претстава во театарскиот опус на познатиот словенечки и меѓународно признат режисер Томаж Пандур кој во април годинава ненадејно почина на проба во МНТ каде го подготвуваше „Кралот Лир“.
– Пандур со алхемичен процес ја преобразува легендата за Фауст во интелектуална и емотивна атмосфера на нашето време и создава своја сопствена поезија и вистина. При вечната борба против сеприсутното зло, го нагласува бескрајниот копнеж кон се што ни е недостапно или неостварливо: кон семејството, љубовта, младоста, убавината. Влегувањето во просторите на магијата, во пределите на космичките сфери, на Фауст, барем за миг, му овозможува доживување и исполнување, љубов, власт и моќ, а со крв потпишаниот договор со Мефисто – или со самиот себе – на крај го враќа во неговата самотија и минливоста на животот, наведува МНТ во најавата за „Фауст“.
На премиерата на „Фауст“ во Љубљана, во септември 2015 година, Пандур изјавил дека ремек делото на Гете – „Фауст“, драмската поема за еден човек кој има потпишано договор со ѓаволот, се нарекува и „божествена трагедија“, бидејќи зборува за микро и макрокосмосот, за личното и јавното, за вештините и знаењето, за неодоливата потреба и постојан стремеж на поединци за се поголемо и подобро, без оглед на цената на овие страсти.
– Приказната за Фауст во текот на вековите се развила архетипски мит за човечките стремежи и дилеми и се обидува да го дешифрира и да го разбере поединецот во неговата постојана борба со доброто и злото. Во оваа адаптација и поставка на Фауст злото настапува во множина; Ѓаволот веќе не е сам, доаѓа со своите соработници за полесно да го изведе својот познат смртен танц. Гледаме маж распнат меѓу небото и земјата, кој се обидува да ја најде вистината и смислата на човечкиот престој. И тоа е суштината на театарот – да се зборува и да поставуваат прашања во врска со една од најважните прашања на човековото постоење, истакнал режисерот на премиерата на „Фауст“.
Насловната улога ја игра Игор Самобор, а актерот Бранко Штрубеј ќе го игра ликот на Мефисто. Во актерската екипа се и: Барбара Церар, Полона Јух, Бранко Јордан, Урош Фурст, Роберт Корошец, Филип Самобор, Жан Перко и Матиц Лукшич. Драматург и автор на адаптацијата на преводот на Божа Водушка и Ерик Воук е Ливија Пандур, сценограф е Свен Јонке (NUMEN), костимограф Фелипе де Лима, дизајнер на видео Доријан Колунџија, композитор Примож Хладник и Борис Бенко (SILENCE) и дизајнер на светло Томаж Пандур.
Претставата трае два и пол часа со една пауза. Билетите се веќе пуштени во продажба на билетарницата на МНТ.
Цената за партер е 600 денари, а за прва и втора галерија е 400 денари.
