Во рамки на програмата за Ноќта на музеите во Пловдив, културно-информативниот центар на Република Македонија во Софија вечерва, 18 мај, ќе ја претстави ликовната изложба „Поврзување”...
Во репрезентативниот простор на „Балабановата куќа” со педесетина дела ќе бидат претставени ликовните уметници Маријана Иванова (плакат), Марјан Ѕин (масло на платно), Зоран Мише (графика), Перица Георгиев -Пепси (масло на платно), Иван Стоименов (скулптура), Горан Тричковски (графика), Слободан Милошески (скулптура), Павел Целкоски (графика) и Иво Пецов (масло на платно).
Културно-информативниот центар на Македонија во Софија, Општинскиот институт „Стар Пловдив” и Организацискиот одбор „Пловдив-Европска престолнина на културата 2019″, трета година соработуваат на заеднички проекти, во 2015 година исто така на Ноќта на музеите, а минатата година со проект-изложба по повод Денот на Франција-14 јули.
Изложбата ќе ја претстават и отворат директорот на КИЦ на РМ во Софија Васко Шутаров и Димитрина Петрова од име на Општинскиот институт „Стар Пловдив”.
Проектот е поддржан и од македонското Министерство за култура.
