Гран При наградата на годинешното четврто по ред издание на поетскиот фестивал „Литературни искри“ во Гостивар ја доби Кристина Мерклер, родена гостиварка која моментално живее и работи во Скопје...
Првото место и припадна на Фросина Тасевска од Штип, второто го освои Цветанка Колева од Кавадарци, а третото, Ирена Јурчева од Скопје.
За најдобар странски автор на овогодинешниот фестивал беше прогласена Марина Јовановиќ од Србија, поетеса, писател и филозоф, автор на неколку стихозбирки и роман.
Наградата „најуспешна млада искра“, ја доби осумнаесетгодишната Ива Пуовиќ од Скопје.
Огранизаторот, Центарот за култура АСНОМ на сите наградени им врачи плакети и книги.
– Ни претставува чест што сме домаќини на овие квалитетни поетски имиња и не радува што нашиот фестивал веќе станува препознатлив меѓу поетската јавност во земјава и надвор од неа, рече директорот на Центарот за култура, Луан Зенки во своето обраќање.
Во изборот на годинешните финалисти, влегоа над 70 поети од Македонија и од балканските земји.
На манифестацијата беше промовирана и заедничката збирка во која се застапени 20-тина поети, селектирани според бодувањето на жирито.
Фестивалот „Литературни искри“ во Гостивар се организира во чест на Денот на Сесловенските просветители, 24-ти Мај, а се одржа во центарот за култура АСНОМ.
