Плакатите од 9-от Скопје постер фестивал на тема „Криза на идентитет“ од 18 мај до 10 јуни ќе бидат изложени во метро станиците во Порто, Португалија...
Презентацијата е резултат на соработката која организаторот на фестивалот – Здружението на дизајнери од Македонија Плакарт ја има со градот Порто и Универзитетот „Лусофона“.
Покрај изложбата, ќе биде организирана и конференција за дизајн на која говорници ќе бидат претседателот на Плакарт, Гере Постеров, основачот на познатото дизајн студио Силва Десигнерс, Хорхе Силва, и дизајнерот кој го иницираше ColorADD – проектот за олеснување на визуелната комуникација со луѓето со попречености во видот, Мигел Неива.
Плакарт соопшти дека во текот на летото изложбата ќе биде претставена и во Полска, САД, Кина…
Во рамки на изложбата вклучени се 50 дела на млади дизајнери, кои учествуваа на 9. Скопје постер конкурс на тема „Криза на идентитет“. Постерите се дела на студенти по дизајн и визуелни комуникации од 24 земји, вклучително двете првонаградени плакати, добитниците на две специјални награди, шест почесни, како и останатите 40 плакати на финалисти.
Дел од поставката е и плакат на македонска студентка од Универзитетот Американ колеџ. Серијата патувачки изложби почна на 22 април со отворање на изложбата во Стартит центарот во Нови Сад, Србија.
Од 1-ви до 7 мај поставката беше презентирана на Неделата на дизајн во Литванија, по што ќе биде изложена на Академијата за уметности во Каунас.
– Изложбите имаат цел да ги пренесат моќните пораки на студентските плакати на тема „Криза на идентитет” ширум Европа и светот, соопшти Плакарт.
